Монгол Улсын Засгийн Газар 2022-2023 оны хичээлийн жилд Нийслэлийн цэцэрлэгийн хүртээмжийг сайжруулж, хүсэлт гаргасан хүүхэд бүрийг сургуулийн өмнөх боловсролд хамруулсан.
Мөн 2022 онд сургуулийн өмнөх боловсролын байгууллагын болон багшийн үнэлгээг хийж, хүүхдүүд харин сургуульд бэлтгэгдсэн байдлаа үнэлүүлсэн юм.
Өөрөөр хэлбэл цэцэрлэгийн хүртээмжээ сайжруулж, оношилгоогоо хийж чадсан учир чанарыг сайжруулах буюу дараагийн алхамыг эхлүүлж байна.
Сургуулийн өмнөх боловсролын сургалтын хөтөлбөрийн шинэчлэлийн хүрээнд олон улсын сургалтын хөтөлбөртэй нийцэх, хувийн хэвшлийн цэцэрлэгт хэрэгжиж үр дүн гарсан “Амьдралын мод” хөтөлбөрийг хот хөдөөгийн 8 цэцэрлэгт туршиж байна. Хөтөлбөрийг Боловсролын ерөнхий газар, Боловсролын судалгааны үндэсний хүрээлэнгээс удирдлага, арга зүйгээр хангаж байна.
Туршилтын хөтөлбөрийг хэрэгжүүлж байгаа 33 дугаар цэцэрлэгт өнөөдөр салбарын сайд болон албаны бусад хүмүүс ажиллаж дунд хугацааны үр дүнтэй танилцлаа. Энэхүү “Амьдралын мод” хөтөлбөрийн онцлог нь хүүхдэд бага наснаас нь эрүүл амьдралын дадал хэвшлийг төлөвшүүлэх, харилцааны болон бүтээлч чадварыг хөгжүүлэх зорилготой. Сургалтын арга зүй, хэрэглэгдэхүүн, үнэлгээний цогц байдлыг хангаснаараа онцлог юм.
Туршилтын хөтөлбөр хэрэгжүүлж бэлэн хэрэглэгдэхүүн хүлээн авснаар багш нарын ажлын ачаалал буурсан байна. Мөн сурагчдын ирц эрс сайжирчээ. Энэ бол эхний үр дүнгүүд юм.
Хөтөлбөрийг 2022-2023 оны хичээлийн жилд туршсан үр дүнд үндэслэн хүүхдийн хөгжил, багшийн ажлын арга барил, сургалтын орчинд гарах ахиц дэвшлийг тодруулан сургуулийн өмнөх боловсролын хөтөлбөрийг шинэчлэхэд тусгах юм гэж Боловсрол, шинжлэх ухааны яамнаас мэдээллээ.
0
0
0
0
0
0
Нийт сэтгэгдэл (0)