.jpg)
Монголбанк энэ оны эхний улирлын мөнгөний бодлогын хорооны хурлаар ахмадын тэтгэврийн зээлд хязгаарлалт тогтоож, зээлээ төлсний дараах үлдэгдэл нь амьжиргааны баталгаажих түвшнийг хангахуйц хэмжээнд хүрэлцээтэй байх шийдвэр гаргасан. Уг шийдвэрийг ахмадууд эсэргүүцсэн бөгөөд улмаар 2 дугаар улирлын мөнгөний бодлогын хороогоор уг зохицуулалтыг зөөлрүүлж, өр, орлогын харьцааг 50/50 хувь байхаар тогтсон. Гэсэн хэдий ч ахмадуудын зүгээс гомдоллохоос гадна, Засгийн газрын түвшинд ч уг зохицуулалтыг дахин авч хэлэлцэх талаар санал хүсэлт ирүүлээд байсан юм.
Иймд Монголбанкны МБХ 2025.07.09-ний өдөр дахин ээлжит бусаар хуралдаж, тэтгэврийн зээлд тавьсан аливаа хязгаарлалтыг бүрэн цуцлах, банкнууд өөр өөрсдийн зохицуулалтаар зээлийг үргэлжлүүлэн олгох шийдвэр гаргав.
Монголбанкнаас гаргасан мэдэгдэлд:
"Монголбанкны Мөнгөний бодлогын хорооны 2025 оны 7 дугаар сарын 7-ны өдрийн ээлжит бус хуралдаанаар банкнаас олгох тэтгэвэр, тэтгэмжийн орлого барьцаалсан зээлийн хувьд гаргасан 2025 оны 3 дугаар сарын 7-ны өдрийн, 6 дугаар сарын 13-ны өдрийн шийдвэрийг хүчингүй болгож, хуучин нөхцөлд нь хэвээр үлдээлээ.
Өндөр настай иргэдийн нийгмийн баталгааг хангах, өрийн хэт өндөр дарамтад орохоос хамгаалах, тэтгэврийн зээлдэгчдийн санхүүгийн эрсдэл, эмзэг байдлыг бууруулах, улмаар инфляцыг бууруулах мөнгөний бодлоготой нийцтэйгээр санхүүгийн салбарын тогтвортой байдлыг дэмжих зорилгоор Монголбанкны Мөнгөний бодлогын хорооны 2025 оны I болон II улирлын ээлжит хуралдаануудаар тэтгэврийн зээлийг зохицуулсан шат дараатай бодлогын шийдвэрүүдийг гаргасан билээ.
Гэвч зээл авах боломжийг нь хязгаарлаж, хүндрэлтэй нөхцөл байдал үүсгэж байгаа талаар зарим иргэдээс ирүүлсэн гомдол, Монгол Улсын Засгийн газар, Улсын Их Хурлын байнгын хороо, УИХ-ын гишүүдээс Монголбанканд ирүүлсэн хүсэлтийг харгалзан үзлээ.
Нөгөөтэйгүүр, тэтгэврийн зээлдэгч нарын хувьд өрийн дарамтаа зохистой түвшинд хязгаарлаж, хэт өндөр зээлийн дарамтаас үүдэлтэйгээр нийгэм, эдийн засгийн баталгаа алдагдах эрсдэлээс өөрсдийгөө хамгаалах нь чухал болж байна. Цаашид тэтгэвэр, тэтгэмж, халамжийн орлого барьцаалсан зээл, түүнээс шалтгаалсан өндөр настай иргэдийн амьжиргааны доройтол зэрэг асуудлыг салбарын яамны зүгээс анхааралдаа авах нь зүйтэй" гэжээ.
0
0
0
0
0
0
Нийт сэтгэгдэл (0)