.png)
НҮБ-ын уур амьсгалын өөрчлөлтийн COP31 бага хурал 11 дүгээр сарын 9-нд Туркийн Анталья хотод эхэлж байна. Дэлхийн дулаарлын эсрэг улс орнуудыг нэгтгэдэг энэ хурлын үр дүн, зохион байгуулалтыг шинэчлэх шаардлага олон улсын түвшинд нэмэгджээ.
COP буюу НҮБ-ын конвенцод нэгдэн орсон талуудын бага хурал нь дэлхийн байгаль орчны тулгамдсан асуудлыг хэлэлцдэг олон улсын механизм юм. Гэвч жил бүр олон арван мянган төлөөлөгч оролцдог ч гаргасан шийдвэрүүдийн хэрэгжилт уур амьсгалын өөрчлөлтийн хурдыг гүйцэхгүй байгааг мэргэжилтнүүд, иргэний нийгмийн байгууллагууд шүүмжилж байна.
Мөн нүүрс, газрын тос, байгалийн хийн салбарын ашиг сонирхлыг төлөөлөгчид хэлэлцээнд оролцдог, хурлыг зохион байгуулахад их хэмжээний зардал гардаг, шийдвэр гаргах үйл явц удаан байдаг нь шүүмжлэлийн гол шалтгаан болжээ.
Үүнтэй холбоотойгоор олон улсын нэр нөлөө бүхий олон арван төлөөлөгч COP хурлын тогтолцоог үндсээр нь шинэчлэхийг уриалсан байна. Түүнчлэн иргэний нийгмийн 200 байгууллага хурлын зохион байгуулалт, шийдвэр гаргах үйл явцад яаралтай өөрчлөлт хийх шаардлага тавьжээ.
Энэ асуудлыг 10 дугаар сарын 19–30-нд Арменийн Ереван хотод болсон Биологийн олон янз байдлын тухай конвенцын COP17 хурлын үеэр мөн хөндсөн байна.
Харин Монгол Улсад 2026 оны 8 дугаар сарын 17–28-нд зохион байгуулсан COP17 нь өөр конвенцын хурал юм. Монгол Улсад болсон COP17 нь НҮБ-ын Цөлжилттэй тэмцэх конвенцын хүрээнд зохион байгуулагдаж, газрын доройтол, цөлжилт, ган, бэлчээрийн нөхөн сэргээлтийн асуудлыг хэлэлцсэн.
Өөрөөр хэлбэл, Туркт болж буй COP31 нь дэлхийн дулаарал, хүлэмжийн хийн ялгарлыг бууруулахад, Монгол Улсад болсон COP17 нь цөлжилт, газрын доройтлыг сааруулахад чиглэсэн. Харин Арменид болсон COP17 нь биологийн олон янз байдлыг хамгаалах асуудлыг хэлэлцсэн юм. Эдгээр хурал нь НҮБ-ын өөр өөр конвенцод харьяалагддаг учраас дугаарлалт нь тусдаа байдаг.
COP хурлуудын үр дүнг сайжруулах асуудал олон улсын хэлэлцүүлгийн сэдэв болж байгаа ч эдгээр уулзалт нь улс орнууд байгаль орчны асуудлаар хамтын шийдвэр гаргах чухал талбар хэвээр байна.
Эх сурвалж: Le Monde, 2026.11.08; НҮБ-ын Цөлжилттэй тэмцэх конвенц; НҮБ-ын Биологийн олон янз байдлын тухай конвенц.
0
0
0
0
0
0
Нийт сэтгэгдэл (0)