Сүүлийн үед олон нийтийн анхаарлын төвд буй ХААН банкны томоохон хувьцаа эзэмшигч HS Holdings-т хөрөнгө оруулсан Японы бизнесмэн, WAYO Holding-ийн ТУЗ-ийн дарга Хатори Жүничитэй Bloomberg TV Mongolia телевиз ярилцлага хийснийг хүргэж байна.
- Ихэнх гадаадын шууд хөрөнгө оруулалт уул уурхайн салбарт чиглэдэг. Харин таны хувьд Монголын банк, санхүүгийн салбарт хөрөнгө оруулсан. Яагаад энэ салбарт хөрөнгө оруулах болсон бэ?
Банкны салбар бол миний ирээдүйд анхаарлаа хандуулах гэж байгаа гол салбар биш л дээ. Бид Монгол Улсад уул уурхайн бизнес эхлүүлж байгаа учраас, мөн Монголчуудтай ихээхэн харилцаа холбоотой ажилладаг гэдэг утгаараа ингэж таарсан. Ер нь нэг талаасаа бол тохиолдол гэх үү дээ. Би Савада гуайг эртнээс таньдаг байсан. Савада надад хандаж хувьцааг нь сонирхож байвал авахыг санал болгосон л доо. Би шууд ХААН банкны хувьцааг авч байгаа юм биш л дээ. Би Савадагийн Sawada Holdings буюу одоогийн HS компанийг авсан. HS Holdings компани ХААН банкны хувьцааг эзэмшдэг.
- ХААН банкны эзэмшлийн өөрчлөлтийн талаар хангалттай мэдээлэл төдийлөн гараагүй. Та энэхүү олон сая ам.долларын хэлцлийн талаар илүү дэлгэрэнгүй ярьж болох уу. Яг юу болж өнгөрсөн бэ?
Тэгэхээр HS Holdings бол Токиогийн хөрөнгийн биржид бүртгэлтэй компани. Би худалдаж авах алхам хийсэн. Ноён Савада надад санал тавьсан учраас. Гэхдээ асуудал нь гэвэл эзэмшигч өөрчлөгдөхөд Монголбанкны зөвшөөрөл хэрэгтэй болсон. Тэгээд зөвшөөрөл авахад жил гаруйн хугацаа шаардагдсан. Эцэст нь Монголын төв банкнаас зөвшөөрлөө авч ноён Савадагийн эзэмшиж байсан хувь надад шилжсэн. Бид ч тохиролцоонд хүрсэн. Токиогийн хөрөнгийн биржээр дамжуулж худалдан авахаар болсон. Харин ноён Савада Монголбанкнаас зөвшөөрөл авах шаардлага надад тавьсан л даа. Ингээд маш их бичиг цаасны ажил болсон. Миний таамаглаж байснаас ч их хугацаа орсон. Хэлцэл эхэндээ тийм ч амжилттай байгаагүй. Ингээд хэдэн сарын дараа Монголбанкнаас эзэмшлийг шилжүүлэх зөвшөөрөл олгосон. Тэгээд би ноён Савадатай дахин холбогдож хувьцаагаа худалдах сонирхол нь хэвээр байгаа эсэхийг асуусан. Тэгээд зөвшилцөлд хүрч түүний хувьцааг худалдаж авсан. Энэ оны 5-р сард Монголбанкнаас албан ёсны захидал хүлээж авсан л даа. Тэгээд ерөнхийдөө хэлцэл эцэслэгдсэн. Одоо HS Holdings ХААН банкны 55 гаруй хувийг эзэмшдэг. Харин би Мета капиталтай холбогдох хамтын ажиллагааны хүрээнд HS Holdings-д хөрөнгө оруулсан. Тэгэхээр ХААН банкны хувьцааг би шууд байдлаар эзэмшдэггүй гэсэн үг. Харин HS Holdings хувьцааг шууд байдлаар эзэмшдэг. Миний хувьд HS Holdings-ийн хяналтын багцыг эзэмшдэг.
- Тэгэхээр хэлцлийн дүн гээд үзвэл хэр их хэмжээний мөнгөний талаар ярьж байна вэ?
Миний хөрөнгө оруулалтыг та асууж байна уу?
- Тийм ээ, хөрөнгө оруулалтын хэмжээ?
Ойролцоогоор 200 сая ам.доллар. Би гэр бүлийн эзэмшлийн холдинг компаниа зарсан байсан.
- Энэхүү хэлцлийн онцгой тал нь юу байсан бэ. Яагаад Монгол гэж, яагаад ХААН банк гэж?
Би үйлдвэрлэлийн салбарын SEIKO групптэй урт хугацаанд хамтран ажилласаар ирсэн. Миний хувьд хагас дамжуулагч болон LCD хавтан зэргийн үйлдвэрлэлийг хариуцдаг байсан. Өндөр чанартай бүтээгдэхүүн үйлдвэрлэхэд түүнд ашиглагдах материал чухал л даа. Гэхдээ шаардлагатай бүх материал гадаадаас орж ирдэг. Тиймээс би материал, түүхий эдийн бизнесийг маш их сонирхдог. Тэгээд 4 жилийн өмнө Монголд ирсэн. Газар доороо нөөц баялаг ихтэй улс. Энэ утгаараа Японы үйлдвэрлэлийн салбарынхны сонирхлыг ихээр татдаг. Тийм учраас хоёр улсын аль алиных нь ашиг тусын тулд хөрөнгө оруулах шийдвэр гаргасан. Ингээд үйлдвэрлэлийн гол бизнесээсээ шилжилт хийж бараа бүтээгдэхүүн импортлоход анхаарах болсон. Банкны бизнес бол миний анхаарлаа хандуулдаг гол ажил биш.
Үргэлжлэлийг доорх холбоосоор орж үзнэ үү.
0
0
0
0
0
0
Нийт сэтгэгдэл (0)